នៅព្រឹកថ្ងៃទី២០ ខែតុលា ឆ្នាំ២០២៥ ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា និង គណៈប្រតិភូសភាកម្ពុជា (ព្រឹទ្ធសភា និងរដ្ឋសភា) បានអញ្ជើញចូលរួមកិច្ចប្រជុំក្រុមប្រឹក្សាភិបាលលើកទី២១៦ (216 session of the Governing Council ) នៃមហាសន្និបាតសហភាពអន្តរសភាលើកទី១៥១ នៅទីក្រុងហ្សឺណែវ ប្រទេសស្វ៊ីស។
កិច្ចប្រជុំបានពិភាក្សាផ្អែកលើរបៀបវារៈសំខាន់ៗ ព្រមទាំងបានអនុម័ត និងកត់សម្គាល់លើ៖ (១) កំណត់ហេតុសង្ខេបនៃកិច្ចប្រជុំក្រុមប្រឹក្សាភិបាលលើកទី២១៥, (២) ការបោះឆ្នោតជ្រើសរើសលោកជំទាវ G. Morawska-Stanecka អនុប្រធាន (IPU) ជាប្រធានដឹកនាំមហាសន្និបាតលើកទី១៥១ (ដោយសារលោកជំទាវ Tulia Ackson មិនបានចូលរួម), (៣) របាយការណ៍របស់ប្រធានសហភាពអន្តរសភាស្តីពីសកម្មភាពរបស់ប្រធាន IPU ក្រោយកិច្ចប្រជុំក្រុមប្រឹក្សាភិបាលលើកទី២១៥ និងសកម្មភាពរបស់គណៈកម្មាធិការប្រតិបត្តិរបស់ IPU, (៤) របាយការណ៍របស់អគ្គលេខាធិការស្តីពីសកម្មភាពរបស់ IPU ប្រចាំឆ្នាំ២០២៥ (៥) ស្តាប់របាយការណ៍លទ្ធផលហិរញ្ញវត្ថុឆ្នាំ២០២៥ របស់ IPU, (៦) ការបញ្ចូលក្រុមប្រឹក្សានីតិប្បញ្ញត្តិព្រុយណេដា រូសាឡឹម (Legislative Council of Brunei Darussalam) ជាសមាជិកទី១៨២ របស់ IPU, (៧) របាយការណ៍នៃសន្និសីទប្រធានសភាពិភពលោកលើកទី៦ និងកិច្ចប្រជុំកំពូលប្រធានសភាជាស្ត្រីលើកទី១៥, (៨) ការកំណត់មូលបទអទិភាពនៃឆ្នាំ២០២៥ ស្តីពីការជំរុញសមភាពយែនឌ័រ និង(៩) បច្ចុប្បន្នភាពនៃការអនុវត្តប្រធានបទអាទិភាពឆ្នាំ២០២៥ ស្តីពីការជំរុញសមភាពយែនឌ័រ។
នៅបន្ទាប់ពីកិច្ចប្រជុំក្រុមប្រឹក្សាភិបាលលើកទី២១៦ ឯកឧត្តមអនុប្រធានទី១ ព្រឹទ្ធសភា និង គណៈប្រតិភូសភាកម្ពុជា បានបន្តអញ្ជើញចូលរួមក្នុងកិច្ចពិភាក្សាទូទៅនៃមហាសន្និបាតIPU លើកទី១៥១ ក្រោមមូលបទ ស្តីពីការប្រកាន់ខ្ជាប់នូវបទដ្ឋានមនុស្សធម៌ និងគាំទ្រសកម្មភាពមនុស្សធម៌ក្នុងគ្រាមានវិបត្តិ ( Upholding humanitarian norms and supporting humanitarian action in times of crisis)។

ប្រភព៖ អគ្គនាយកដ្ឋានពិធីការ និងទំនាក់ទំនងអន្តរជាតិ